අද (14) මධ්‍යම රාත්‍රියේ සිට ක්‍රියාත්මක වන පරිදි 2025 වසරේ තෙවන අර්ධය සඳහා විදුලි බිල සංශෝධනය නොකිරීමට මහජන උපයෝගීතා කොමිසම ඒකමතිකව තීරණයක් ගෙන තිබෙනවා.

එම කොමිසමේ සභාපති මහාචාර්ය කේ. පී.එල් චන්ද්‍රලාල් මහතා පැවසුවේ විදුලි ගාස්තු සංශෝධනය ඉදිරි මාස 3 සඳහා කිසිඳු වෙනසක් නොකරන බවයි.

අද (14) පැවැති විශේෂ මාධ්‍ය හමුවකට එක්වෙමින් ඔහු මේ බව සඳහන් කළා.

2025 වසරේ තෙවන විදුලි ගාස්තු සංශෝධනය සඳහා 6.8%ක විදුලි ගාස්තු ඉහළ දැමීමක් සිදුකරන ලෙස ලංකා විදුලිබල මණ්ඩලය මහජන උපයෝගීතා කොමිෂන් සභාවෙන් ඉල්ලීමක් කර තිබුණා.

මේ අනුව අදාළ විදුලි ගාස්තු සංශෝධනය පිළිබඳව මහජන අදහස් හා යෝජනා ලබා ගැනීම සිදුකළ අතර එම කටයුතු පසුගිය 8 වනදා අවසන් වුණා.
"ඇත්තටම කිව්වොත් අනෙකුත් වියදම් එක්ක විදුලිබල මණ්ඩලය 6.8%කට වැඩි විදුලි බිල සංශෝධනයක් අපේක්ෂා කරලා තිබුණා. මේකෙදි අපේ අදහස වුණේ, පහුගිය කාලපරිච්ඡේදයන්ට අදාළව ක්‍රමවේදයට අනුව කිසියම් ආකාරයක ගැලපීමක් සිදුකළ යුතු වෙනවා. අපි ඒකට කියනවා ආදායම් වෙනස ගැලපීම කියලා. මෙතන ප්‍රශ්නය වුණේ පහුගිය කාලයේ විදුලි බිල ගැන තීරණය ගත්තේ මාස 6කට වරක්. දැන් අපිට සිදුවෙලා තියෙනවා කාර්තු වශයෙන් අදාළ තීරණය ගන්න. පහුගිය කාර්තු තුනකට අදාළ ලාභ ගැලපීමක් සිදුකළ යුතුව තිබුණා. මේ කාර්තුව සඳහා. කාර්තු තුනක ගැලපීම එක තැනකට ගේන එක හොඳ නෑ කියලා කොමිසම තීරණය කළා."