වැලිගම ප්‍රාදේශීය සභාවේ සභාපති වෙඩි තබා ඝාතනය කිරීමේ සිදුවීම පිළිබඳව දකුණ පළාත භාර ජ්‍යෙෂ්ඨ නියෝජ්‍ය පොලිස්පතිවරයාගේ උපදෙස් මත කණ්ඩායම් 4ක් මේ වන විට ආරම්භ කර තිබෙනවා.

කැබිනට් තීරණ දැනුම්දීමේ මාධ්‍ය හමුවේ දී පොලිස් මාධ්‍ය ප්‍රකාශක, සහකාර පොලිස් අධිකාරී, එෆ්. යූ. වුට්ලර් මහතා පැවසුවේ යතුරු පැදියකින් පැමිණි පුද්ගලයින් දෙදෙනෙක් පිස්තෝල වර්ගයේ ගිනි අවියකින් වෙඩි තැබීම සිදුකර ඇති බවයි.

අදාළ ඝාතනය සඳහා උණ්ඩ 4ක් භාවිත කර ඇති බව මුලික විමර්ශනවලදී අනාවරණය වී තිබෙනවා.

වැලිගම ප්‍රාදේශීය සභාවේ සභාපති ලසන්ත වික්‍රමසේකර හෙවත් මිදිගම ලසා ඔහුගේ කාර්යාලය තුළදීම අද (22) උදෑසන 10.30ට පමණ වෙඩි තබා ඝාතනය කෙරුණා.

සභාපතිවරයාගේ නිල කාමරය තුළට පැමිණි නාඳුනන තුවක්කුකරුවකු වෙඩි තැබීම සිදුකර පලා ගොස් ඇති බව පොලීසිය පැවසුවා.

අද (22) සභාපතිවරයාගේ මහජන දිනයක් වූ බැවින් ඔහුව හමුවීම සඳහා මහජනතාවට වෙලාව වෙන් කර තිබූ බව සඳහන්.

වෙඩික්කරු ද සාමාන්‍ය පුද්ගලයෙකු මෙන් සුදු පැහැති ඇඳුමකින් සැරසී, කළු පැහැති මුව ආවරණයක් පැළද ඔවුන් අතර රැඳී සිට තිබෙනවා.

ඒ අතරවාරයේ කාන්තාවක් සභාපතිවරයාගේ නිල කාමරයට ගොස් ඔහු ලවා ලිපියක් අත්සන් කරගෙන පිටතට පැමිණීමේ දී වෙඩික්කරු නිල කාමරය තුළට ඇතුළු වී ඇති බව පොලීසිය සඳහන් කළා.

වෙඩි ප්‍රහාරයෙන් පසුව වෙඩික්කරු යතුරුපැදියකින් පළාගොස් තිබෙනවා.

පොලීසිය පැවසුවේ සභාපතිවරයාගේ හිසට හා ගෙලට වෙඩි ප්‍රහාරවලින් බරපතළ තුවාල සිදුවූ තිබූ බවයි.

වෙඩි වැදී තුවාල ලබා සිටි සභාපතිවරයා කඩිනමින් රෝහල්ගත කළ නමුත් රෝහල්ගත කිරීමෙන් පසුව සභාපතිවරයා මියගිය බව රෝහල් ආරංචි මාර්ග සඳහන් කළා.

මියයන විට ඒ මහතා 38 වන වියේ පසුවුණා.

වෙඩි තැබීම සඳහා පිස්තෝල වර්ගයේ ගිනි අවියක් භාවිත කර ඇති අතර වෙඩි තැබීමට හේතුව මෙතක් අනාවරණය වී නැහැ.